„Mér fannst þetta mjög opinn leikur fyrsta hálftímann en við breyttum aðeins áherslum eftir þann tíma. Eftir það fannst mér við heilt yfir vera með leikinn. Við fengum stöður til þess að skapa fleiri góð færi og fyrir vikið hefðum við getað skorað fleiri mörk,“ sagði Jakob Leó Bjarnason, þjálfari Hauka, eftir 2-0 sigur á Augnablik í kvöld.
Lestu um leikinn: Haukar 2 - 0 Augnablik
„Ég get viðurkennt það að ég var ekki rólegur í fyrri hálfleik. Mér fannst leikurinn það opinn. En í seinni var þetta aldrei spurning.“
Haukar léku manni fleiri síðasta hálftíma leiksins eftir að Telmu Ívarsdóttur, markverði Augnabliks, var vikið af velli. Jakobi Leó fannst dómarinn hafa metið það atvik rétt.
Í Inkasso-deild kvenna mega liðin gera 5 skiptingar og það voru 10 skiptingar gerðar í síðari hálfleik í leiknum. Það hægði mjög á honum en að sama skapi fengu margir ungir leikmenn tækifæri. Við spurðum Jakob Leó út í þessar 5 skiptinga reglur.
„Mér finnst það fínt. Sem þjálfari viltu geta dreift spiltíma á hópinn þinn. Menn geta náttúrulega nýtt sér þetta á neikvæðan hátt. Látið leiki deyja út með því að taka eina og eina skiptingu í einu,“ svaraði Jakob Leó og bætti við að honum fyndist þjálfarar í deildinni fara vel með regluna. Það mætti þó skoða að útfæra hana öðruvísi.
Nánar er rætt við Jakob Leó í spilaranum hér að ofan.
