Gústi á hliðarlínunni í úrslitaleiknum í fyrra.
„Ég vonast til að það verði fullt af fólki," sagði Ágúst Gylfason, þjálfari Breiðabliks, í samtali við Fótbolta.net en í kvöld heimsækja Blikar lið Víkings R. í undanúrslitum Mjólkurbikars karla.
Leikurinn hefst klukkan 19:15 og fer hann fram undir flóðljósunum á Víkingsvelli. Víkingur fór síðast í bikarúrslit 1971 þegar liðið varð bikarmeistari eftir sigur á Breiðablik, en stefnt er á að setja vallarmet á Víkingsvelli í kvöld.
Breiðablik fór í úrslitaleikinn í fyrra en tapaði þar gegn Stjörnunni í vítapsyrnukeppni. Nú dugar ekkert annað en að fá bikarinn í hendurnar.
„Það er það sem við viljum. Við fengum smjörþefinn í fyrra, en við viljum vinna þennan titil. Hann er stór og þetta er stórleikur í íslenskum fótbolta."
Um leikinn gegn Víkingum segir Gústi: „Ég reikna með að þetta verði mikil skemmtun, mikill hraði og sóknarbolti. Ég býst við hörkuleik. Víkingarnir eru með gott lið. Þetta eru undanúrslit í bikar og hvorugt lið er sigurstranglegra. Þetta verður 50/50 leikur og bara spurning um hvernig liðin koma gíruð."
„Það eru allir klárir hjá mér. Við tökum æfingu eftir klukkutíma og svo tökum við stöðuna á hópnum. Við grillum ofan í liðið og horfum á FH - KR í hinum undanúrslitaleiknum. Við verðum tilbúnir á morgun," sagði Gústi í gær.
Viðtalið er í heild sinni hér að ofan.
