Lestu um leikinn: Frakkland 4 -  0 Ísland

Íslenska liðið átti í miklum erfiðleikum með franska liðið frá fyrstu mínútunni og það var nokkuð ljóst í hvað stefndi er Samuel Umtiti skoraði fyrsta markið snemma leiks. Frakkar bættu við þremur í viðbót og 4-0 tap staðreynd.

„Þegar við erum 1-0 undir og þó við höfum ekki verið að spila vel í dag þá erum við inn í leiknum. Það kemur fyrir að liðið missir einbeitinguna, þá gerast klaufaleg mstök og opnast allt ennþá meira og ég veit ekki hvernig á að lýsa því, þetta var bara klúður," sagði Ragnar við fjölmiðla í kvöld.

Erik Hamrén, þjálfari íslenska liðsins, hefur verið að prufa að spila með fimm manna vörn og gerði það gegn Frökkum í kvöld en það gekk ekki upp og vildi Ragnar lítið tjá sig um kerfið.

„Það getur verið. Ég held að það séu ekki margir að spila þessa taktík með félagsliðum og getur verið erfitt að breyta um taktík og ekki hægt að skella allir sökinni á það. Við vorum ekki nógu góðir í dag og þeir voru helvíti góðir í að klára færin."

„Við náðum að æfa það aðeins en ég vil helst ekki vera að tala um taktíkina hérna. Við reyndum að gera okkar besta alla vega en mér finnst þeir alltaf eins, þeir eru bestir heimi en það „lookar" oft eins og það sé ekkert í gangi en svo kemur einhver sending, stórhætta og þeir eru hrikalega góðir," sagði Ragnar.

Það er nóg af leikjum eftir og Ragnar er bjartsýnn á framhaldið en hann segir að liðið verði að læra af þessu og horfa fram á við.

„Ef að við vinnum leikina sem við eigum að vinna þá höfum við efni á að tapa á móti Frökkum úti en auðvitað viljum við ekk tapa 4-0. Við komum hingað til að vinna og vorum rassskelltir og þurfum að læra af þessu og halda áfram," sagði hann í lokin.