Tómas Bent Magnússon.
Gekk í raðir Vals.
Var lykilmaður hjá ÍBV.
„Það er bara flott. Þetta er öðruvísi en að vera í Eyjum og í fyrsta skipti þar sem ég er í öðru félagi," segir Tómas Bent Magnússon, nýr leikmaður Vals, í viðtali við Fótbolta.net.
Tómas Bent er 22 ára gamall og skrifaði undir þriggja ára samning við Val á dögunum.
Tómas Bent er 22 ára gamall og skrifaði undir þriggja ára samning við Val á dögunum.
Hann hefur gegnt lykilhlutverki í liði Eyjamanna síðustu ár og var frábær er liðið vann Lengjudeildina í haust, en hann var valinn í lið ársins hér á Fótbolta.net
Hann segir það auðvitað erfitt að yfirgefa uppeldisfélagið sitt.
„Já, auðvitað. En þetta er bara tíminn til þess að breyta til. Ég bý í bænum og svona. Mig langaði að fá nýja áskorun," segir Tómas.
„Það voru einhverjir möguleikar í boði en það breytir engu núna. Maður er bara orðinn Valsari."
Alvöru atvinnumannaumhverfi
Hann æfði með Val áður en hann samdi við félagið. Hann er spenntur fyrir nýrri áskorun á Hlíðarenda.
„Þetta er alvöru atvinnumannaumhverfi og það er æft á morgnana. Hópurinn er stór og góður. Þeir vilja gera eitthvað og mér líst vel á það. Ég tel mig geta bætt mig þarna," segir Tómas.
Hópurinn er afar vel mannaður og á Hlíðarenda er stefnt á að vinna alla titla.
„Það eru leikmenn þarna sem hafa verið á efsta stigi. Það er bara geggjað," segir Tómas.
Það var ekkert erfitt
Tengdafaðir Tómasar er Helgi Sigurðsson, aðstoðarþjálfari Fram sem er einnig í Bestu deildinni. Var erfitt að segja honum að þú værir að fara í Val?
„Nei, hann hefur verið í Val sjálfur og þekkir þennan bolta. Það var ekkert erfitt," segir Tómas.
Hvernig verður að mæta honum næsta sumar?
„Ég hef mætt honum áður og það er bara gaman. Við tölum ekki saman daginn áður og þá er allt í lagi. Við tölum mikið saman um fótbolta. Við erum báðir United menn og svona. Hann þekkir þennan heim inn og út. Það er gott að geta sótt ráð frá honum."
Skemmtilegasta sumarið hingað til
Tómas endaði tíma sinn hjá ÍBV á því að hjálpa liðinu að komast upp í Bestu deildina. Hann fer þaðan sáttur.
„Þetta var skemmtilegasta sumarið hingað til og hópurinn algjörlega geggjaður," segir miðjumaðurinn.
„Við vinnum deildina með einu stigi. Þetta var alvöru deild. Það var geggjað að spila fyrir Hemma Hreiðars. Við erum náskyldir og ég verð að segja það," sagði Tómas léttur og bætti við að það yrði örugglega smá skrítið að spila gegn ÍBV í sumar. Markmiðið hans er að gera vel með Val en þar eru framundan spennandi tímar.
Allt viðtalið má sjá í spilaranum hér að ofan.
Athugasemdir
