Kristján Guðmundsson þjálfari Stjörnunnar var gríðarlega ánægður með leikmenn sína þrátt fyrir 2-1 tap gegn Val fyrr í kvöld.
Liðin mættust í fyrstu umferð Íslandsmótsins og komst Valur tveimur mörkum yfir en Stjarnan átti flottan leik, minnkaði muninn og komst nálægt því að jafna.
Kristján telur Stjörnuna hafa verið betra liðið á vellinum og var ósáttur með að hafa ekki fengið vítaspyrnu á lokamínútunni.
„Heilt yfir vorum við betra liðið. Við sköpuðum okkur færi til að ná í stig og vinna. Svo eigum við að fá víti á lokamínútunni. Við erum bara ánægð eftir þennan leik, í flestu í fótbolta vorum við betri en andstæðingarnir í dag," sagði Kristján.
„Þó hún fari ekki niður þá er togað í peysuna og það er vítaspyrna. Þarna þurfum við kannski bara að öskra meira til að fá vítið en það er kannski erfitt að dæma víti á það lið sem er spáð Íslandsmeistaratitlinum á 94. mínútu. Ég skil það alveg, það eru allir mannlegir."
Kristján var mjög bjartsýnn í viðtalinu og er spenntur fyrir sumrinu þar sem yfirlýst markmið er að enda í efri hluta deildarinnar.
