Jóhann Berg Guðmundsson sneri aftur í lið Burnley um helgina þegar hann spilaði 84 mínútur í 1-0 sigri á Everton. Jóhann er kominn á fulla ferð eftir að hafa verið meiddur á kálfa undanfarnar vikur.
„Það var mikilvægt að ná smá leikæfingu fyrir leikinn á móti Frökkum," sagði Jóhann Berg fyrir landsliðsæfingu í dag en hann segist ekki hafa nuddað Gylfa upp úr tapinu um helgina.
„Auðvitað höfum við talað saman eftir leik og allt í góðu. Við höfum spilað nokkuð oft á móti hvor öðrum og erum ekki mikið að stuða hvorn annan. Það var frábært fyrir okkur að fá þrjá punkta," sagði Jóhann en Burnley er með tólf stig í sjöunda sæti ensku úrvalsdeildarinnar.
„Við erum sáttir en satt besta að segja gætum við verið með fleiri stig. Á móti Wolves úti skoruðu þeir til dæmis á 92. mínútu. Við getum lítið verið að kvarta. Tímabilið í fyrra byrjaði mjög illa og við lærðum mikið af því. Við erum mjög ánægðir með þetta."
Heimsmeistarar Frakka koma í heimsókn á Laugardalsvöll á föstudaginn og Jóhann er spenntur fyrir þeim leik.
„Það eru ansi margir þættir í okkar leik sem verða að vera upp á tíu. Það vita það allir að þeir eru með frábært lið. Við erum bestir þegar við spilum á heimavelli og þá er erfitt að eiga við okkur. Það hjálpar okkur gríðarlega mikið að hafa fullan völl. Við þurfum allir að eiga leik upp á tíu til að vinna Frakka," sagði Jóhann.
Hér að ofan má sjá viðtalið í heild sinni.
Athugasemdir