Arnar Gunnlaugsson
„Mér líst mjög vel á þennan leik," segir Arnar Gunnlaugsson, þjálfari Víkings, um stórleik Íslands og Ungverjalands í kvöld þar sem sæti á EM er í húfi.
„Þetta er svipuð tilfinning og fyrir Rúmeníu leikinn. Okkar helstu póstar eru allir með. Þetta voru leiðinlegar fréttir með Arnór Ingva en við erum með menn til að koma inn í staðinn fyrir hann. Menn eru klárir og það hafa verið jákvæð viðtöl við alla. Hugarfarið virðist vera spot on eins og í 99% tilfella þegar þessi lið koma saman."
Sigurliðið í leiknum í kvöld fær einn og hálfan milljarð í sinn hlut fyrir að komast á EM.
„Þetta er hrikalega mikilvægur leikur fyrir íslenska knattspyrnu. Ekki bara í ljósi þess að komast í úrslitakeppnina heldur líka í ljósi þess fjármagns sem mun renna inn í knattspyrnuhreyfinguna. Þetta verður veisla," sagði Arnar.
Kári Árnason, varnarmaður Víkings, verður í eldlínunni í kvöld en hann er klár eftir meiðsli sem hann varð fyrir gegn Rúmenum í síðasta mánuði.
„Það eru 4-5 leikmenn sem landsliðið getur ekki verið án í þessum stórleikjum og hann er í þeim hópi. Reynslan sem hann og fleiri strákar búa yfir mun hjálpa til. Þeir hafa verið í þessari aðstöðu og vita hvað þarf til. Við þekkjum okkar leikskipulag og erum ekki að fara að gera neitt annað á morgun (í kvöld)."
Hér að ofan má horfa á viðtalið í heild sinni.
