Þór/KA vann sannfærandi 5-0 sigur á Tindastóli í 9. umferð Bestu deildar kvenna í kvöld en öll mörkin komu í síðari hálfleiknum.

Heimakonur fengu hættulegasta færið í fyrri hálfleiknum er Sandra María Jessen var ein gegn opnu marki en skaut boltanum framhjá.

Liðið var staðráðið í því að gera betur í þeim síðari og gerði liðið svo sannarlega það og gott betur.

Dominique Jaylin Randle opnaði leikinn með sínu fyrsta marki fyrir Þór/KA á 62. mínútu. Þrumaði hún þá boltanum í netið eftir hornspyrnu og tveimur mínútum síðar bætti Karen María Sigurgeirsdóttir við öðru. Hulda Ósk Jónsdóttir lagði upp markið.

Una Móeiður Hlynsdóttir gerði þriðja markið á 68. mínútu og aftur var það Hulda með stoðsendinguna. Það var næst komin röðin að Huldu að skora og var það af dýrari gerðinni. Hún skrúfaði boltanum laglega í netið og kórónaði hún síðan frábæran leik sinn með vítaspyrnumarki undir lokin.

Tvö mörk og tvær stoðsendingar frá Huldu í dag og Þór/KA upp í 4. sætið með 15 stig en Tindastóll í 8. sæti með 8 stig.