,,Þannig förum við inn í leikinn á móti Þýskalandi"
Glódís Perla Viggósdóttir.
Frá æfingu fyrr í dag.
„Við tókum fína æfingu í gær og höfum verið að funda mikið, að fara yfir hlutina eftir leikinn gegn Wales og fyrir leikinn gegn Þýskalandi," sagði Glódís Perla Viggósdóttir, fyrirliði landsliðsins, þegar hún ræddi við Fótbolta.net í Düsseldorf í dag.
„Það fer vel um okkur."
„Það fer vel um okkur."
Annað kvöld spilar Ísland sinn annan leik í Þjóðadeildinni er þær mæta ógnarsterku liði Þýskalands. Stelpurnar byrjuðu Þjóðadeildina á 1-0 sigri gegn Wales og stefna á að bæta við stigum á töfluna á morgun.
„Það var margt í leiknum gegn Wales sem við getum tekið áfram með okkur inn í þessa keppni. Varnarleikurinn var sterkur. Ég er gríðarlega ánægð að hafa byrjað þetta og vonandi gefur þetta okkur sjálfstraust inn í þessa keppni."
Varnarleikurinn var sterkur en liðið getur haldið betur í boltann. Glódís er sammála því en segir líka: „Að sama skapi má ekki gleyma því að þegar Ísland hefur náð árangri, þá snýst það ekki um að vera góðar með boltann. Það snýst frekar um að spila sterkan varnarleik; íslenska geðveikin. Það er sama hvaða landslið það er, hvort það sé við eða karlarnir, þá einkennir það okkur. Við verðum að passa okkur á því að missa ekki marks á því að það er það sem gerir okkur Ísland. Þannig förum við inn í leikinn á móti Þýskalandi."
Það gekk gríðarlega vel í 4-4-2 varnarleiknum
Glódís er fyrirliði liðsins og leiðtoginn á vellinum, sérstaklega varnarlega. Það vakti athygli eftir leikinn gegn Wales að hún talaði um smá misskilning í skipulagi í viðtali við RÚV, sem hafði þó engin áhrif á leikinn. „Við áttum ekki að verjast í 4-4-2, það var einhver misskilningur," sagði Glódís hlæjandi að leikslokum. „Ég hélt það í fyrri hálfleik en það var ekki þannig. Ég tek það á mig," sagði Glódís.
Stelpurnar áttu að verjast í 4-2-3-1 eða 4-3-3 gegn Wales og reyndu að sækja í útgáfu af 3-5-2. Glódís var spurð frekar út í þessi ummæli í viðtali áðan.
„Það gekk gríðarlega vel í 4-4-2 í varnarleiknum. Það skipti kannski ekki höfuðmáli hvort að annar framherjinn væri alltaf að spila aðeins neðar eða ekki. Við höfum svolítið verið að mixa kerfunum, hvort við séum að spila hápressu eða lágpressu eða með boltann. Það er því kannski ekki óeðlilegt að inn á milli séu ekki allir í réttum stöðum alltaf. Við verðum að geta leyst það inn á vellinum og mér fannst við gera það á móti Wales," segir Glódís.
„Í fótbolta er hægt að tala um kerfi og alls konar. Á endanum snýst þetta mest um að gera þetta sem lið og leysa það sem kemur upp inn á vellinum. Það er ekki hægt að teikna upp allt sem gerist og maður þarf að bregðast við því."
Varnarleikurinn gegn Wales var frábær og liðið fékk ekki á sig mörg færi í leiknum.
„Mér fannst við ná að leysa varnarleikinn vel og það verður algjör lykill á móti Þýskalandi líka. Þar erum við að mæta liði sem er enn betra með boltann og með betri einstaklinga. Við þurfum að vera klár í það og við þurfum að klára einvígin," segir Glódís.
Hægt er að sjá viðtalið í spilaranum hér að ofan þar sem Glódís ræðir meðal annars um leikinn fræga gegn Þýskalandi árið 2017.
