Gunnar Þorsteinsson, fyrirliði Grindavíkur.
Það var sigurreifur fyrirliði Grindavíkur sem mætti í viðtal hjá fréttaritara Fótbolta.net eftir sigur Grindavíkur á ÍBV á Mustad vellinum í Grindavík í dag. Eftir rúmlega tveggja mánaða eyðimerkurgöngu náði Grindavík loks að landa sigri og þar með þremur mikilvægum stigum í botnbaráttunni.
Lestu um leikinn: Grindavík 2 - 1 ÍBV
„Mér fannst við byrja leikinn vel, vorum vel undirbúnir og vissum alveg hvað var í húfi. Okkur er svo kippt niður á jörðina þegar þeir skora og vorum í rosa basli seinni hlutan af fyrri hálfleik en svo tökum við okkur bara vel saman í andlitinu í hálfleik og komum mjög vel gíraðir í seinni hálfleik," sagði Gunnar um leik Grindavíkur í dag.
Sóknarleikur hefur ekki verið sterkasta hlið Grindavíkur í sumar. En hvert var leikplanið eftir að hafa jafnað leikinn?
„Það er ekkert launungarmál að við höfum byggt á þéttum varnarleik í sumar en þessi leikur var svolítið öðruvísi að því leyti af við þurftum einfaldlega að sækja 3 stig þannig að það vissu það allir fyrir leikinn að ef við þyrftum að sækja til sigurs myndum við leggja allt í sölurnar.“
Sagði Gunnar Þorsteinsson fyrirliði Grindavíkur en allt viðtalið má sjá hér að ofan.
