Lestu um leikinn: Breiðablik 1 -  2 Maccabi Tel Aviv

Breiðablik spilaði mjög vel á löngum köflum og þeir voru sterkari aðilinn lengi vel.

„Þessi frammistaða verðskuldaði ekkert minna en þrjú stig. Þetta er mjög svekkjandi en að sama skapi er ég mjög stoltur af liðinu, og félaginu. Með engum fyrirvara var búin til frábær aðstaða fyrir þennan leik í riðlakeppni Evrópu. Fyrir utan svekkjandi úrslit er ég stoltur af liðinu."

Frammstaðan var líka góð í síðasta leik á móti Gent. Af hverju ná Blikar í engin stig í þessum tveimur leikjum?

„Ég get ekki ímynda mér það að þeir séu með meira en núll komma eitthvað í xG. Þeir eru örugglega nær núll en einum. Þeir fá varla færi í leiknum. Á meðan við fáum ótal sénsa til að komast í 1-0, til að komast yfir eftir að við jöfnum, til að jafna leikinn. Ég veit það ekki, það er erfitt að greina þetta allt núna. Þetta er svekkjandi niðurstaða."

Það er gríðarlegur munur á þeim fjármunum sem Blikar eru með á bak við sig og þeim fjármunum sem Maccabi er með. Það sást ekki á frammistöðunni í leiknum.

„Það er hrós fyrir okkur að þeir mæta til að tefja, grýta sér í jörðina, leika á og plata dómarann. Þeir reyna að draga niður tempóið í leiknum með allt það fjármagn sem þeir eru með á bak við sig. Þeir eru með dýra landsliðsmenn héðan og þaðan úr heiminum. Það er hrós fyrir okkur. Við vorum að mínu mati betra liðið í 90 mínútur í dag," sagði Halldór.

Það var mikill hiti í kringum þennan leik. Fyrir utan Kópavogsvöll, þar sem leikurinn fór fram, var mikill fjöldi að mótmæli og var mikil löggæsla. Stríðsátök geysa fyrir botni Miðjarðarhafs, milli Ísralesmanna og Palestínumanna. Félagið Ísland – Palestína og hreyfingin BDS Ísland stóðu fyrir mótmælunum sem settu sinn svip á leikinn.

Andrúmsloftið var spennuþrungið og það varð ekkert minna spennuþrungið þegar Dan Biton, leikmaður Maccabi, skoraði í fyrri hálfleik. Hann fagnaði með því að hlaupa að bekknum og ná í ísraelska fánann. Það var hiti á vellinum eftir þetta og áhorfendur bauluðu á Biton meðan hann fagnaði með ísraelska fánanum. Dóri er pirraður á því að dómarateymið og UEFA hafi leyft Biton að komast upp með þetta.

„Ég held að okkur hafi tekist ágætlega í aðdraganda leiksins að útiloka þessa utanaðkomandi þætti. Okkur tókst það líka ágætlega í leiknum þangað til þeir eru sjálfir með pólitískan áróður inn á vellinum. Það er auðvitað til skammar, og það er ótrúlegt að dómarateymið og UEFA hafi tekið þátt í þessu leikriti sem er boðið upp á. Í smástund var erfitt að útiloka þetta en svo fannst mér við koma sterkir út í seinni hálfleikinn."

Það er einn leikur eftir í riðlinum en sá leikur er gegn Zorya Luhansk á útivelli. Blikar eru enn án stiga en ná vonandi í sín fyrstu stig þar.

„Við ætlum alltaf að vinna. Auðvitað er þreytt að segja að við verðskuldum hitt og þetta. Við spiluðum vel og töpuðum. Við þurfum að byggja ofan á þetta og við ætlum okkur sigur í þessum síðasta leik," sagði Dóri en hægt er að sjá allt viðtalið í spilaranum hér fyrir ofan.