Kórdrengir og Fylkir gerðu jafntefli í Safamýri í kvöld þar sem Kórdrengir voru mun betri í fyrri hálfleik en leikur Fylkis batnaði mikið eftir hlé og jafntefli niðurstaðan.
Lestu um leikinn: Kórdrengir 1 - 1 Fylkir
„Þetta var leikur tveggja hálfleika. Við vorum töluvert betri í fyrri hálfleiknum. Heilt yfir er ég ekkert gríðarlega sáttur við jafntefli, ég hefði viljað fá meira út úr þessum leik," sagði Davíð Smári Lamude, þjálfari Kórdrengja, eftir leikinn.
Fylkismenn jöfnuðu eftir markmannsmistök.
„Ég stend hinumegin á vellinum og sá þetta ekki. Ég verð að skoða þetta," sagði Davíð.
Spánverjinn Iosu Villar sem kom til Kórdrengja fyrir tímabilið átti mjög góðan leik á miðjunni en stoðsending hans í marki Kórdrengja var frábær.
„Þetta var gull af sendingu. Hann þarf að venjast íslenskum fótbolta aftur og hefur þurft tvo til þrjá leiki til að finna sig. Hann steig upp í dag, mér fannst hann frábær og sérstaklega í fyrri hálfleik. Sendingin er eitthvað sem sést ekki í þessari deild."
Daði Bergsson meiddist í Boganum í fyrstu umferð, hvernig er staðan á honum?
„Mjög jákvæðar fréttir í dag. Þetta er smá trosnun og beinmar, en hvað það er í tíma veit ég ekki," sagði Davíð Smári.
