Arnar Gunnlaugsson, þjálfari Víkings R. var að vonum sáttur eftir dramatískan 2-3 sigur á KA í Bestu-deild karla í dag. Birnir Snær Ingason tryggði Íslands- og bikarmeisturunum stigin þrjú með marki á 90. mínútu.
„Þetta var rosalegur leikur. Kaflaskiptur leikur. Við áttum okkar móment og KA sín móment. Mér fannst einhvernveginn KA svona vilja þetta meira svona fyrstu 60-70 mínúturnar. Við vorum einhvernveginn undir í öllum návígum, en svo fundum við bara kraftinn. Að mínu mati er þetta bara hræðslan við að tapa titlinum sem að dreif okkur áfram. Einhversstaðar grófum við djúpt inn í sálina til að finna kraftinn til að eiga einhvern séns í að fyrsta lagi, jafna leikinn og gera þetta sigurmark,'' sagði Arnar.
Lestu um leikinn: KA 2 - 3 Víkingur R.
Hann hélt áfram: „Bæði lið langaði þetta svo mikið. Eitt stig hefði ekki gert eitt eða neitt fyrir bæði lið. Þetta var opið og skemmtilegt í báða enda og sem betur fer fengum við þrjú stigin.''
Leikurinn var gríðarlega jafn og hraður. Í kjölfar jöfnunarmarks Víkings hékk leikurinn í algjöru jafnvægi þar sem að bæði lið sóttu til sigurs. Undirritaður var nokkuð viss um að sigurmark kæmi, en hvoru megin það myndi koma var engan veginn hægt að spá fyrir um.
„KA fékk færi og hættulegar sóknir. Oftast var það eftir góða pressu þeirra og við að missa boltann klaufalega frá okkur. Það var kraftur í KA mönnum í dag og þeir sýndu það og sönnuðu að þeir eiga svo sannarlega skilið að vera í þessari toppbaráttu. Ég hef líka alltaf sagt það að það er nóg eftir og þeir eiga eftir að vera örlagavaldar í þessu móti.''
Sumarið hefur verið frábært hjá Víkingum nú þegar. Stóðu sig með miklum sóma í Evrópukeppnum og eru í toppbaráttu í deildinni, ásamt því að vera komnir í undanúrslit Mjólkurbikarsins.
„Þetta er búið að vera ótrúlegt sumar. Það er búið að ganga svo mikið á og búin að vera svo mikil rótering á liðinu. En strákarnir hafa sýnt ótrúlegan karakter við allar aðstæður. Við höfum alltaf mætt til leiks og aldrei kvartað og kveinað. Það er gríðarlegur karakter í þessum strákum og heiður að þjálfa þá. Það verður bardagi aftur á miðvikudaginn og svo deildin áfram. Þetta er bara algjör veisla. Þú ert í þessu sporti og íþróttum til að taka þátt í svona ævintýri og svona mómentum þar sem þú ert inni í öllum mótum, þannig að þetta er bara geggjað.''
En gefst tími til þess að njóta þess?
„Nei,'' sagði Arnar. „Þú hefur engan tíma til að njóta. Það er alltaf næsti leikur. Það er korter í næsta leik og þannig á það líka að vera. Þetta er bara einn lítill hlekkur á vegferðinni í að reyna að verja þessa titla, þannig að vonandi fáum við að njóta í lok október.''
