Chris Brazell, þjálfari Gróttu.
„Þetta var erfiður leikur. Fyrri hálfleikurinn var jafnari en sá seinni. Fyrri hálfleikurinn var góður bardagi tveggja góðra liða," sagði Chris Brazell, þjálfari Gróttu, eftir naumt tap gegn bikarmeisturum Víkings í Lengjubikarnum í kvöld.
Grótta leikur í Lengjudeildinni en tókst samt sem áður að gefa Víkingum hörkuleik í kvöld.
Grótta leikur í Lengjudeildinni en tókst samt sem áður að gefa Víkingum hörkuleik í kvöld.
„Við erum mjög vonsviknir að fá ekki að minnsta kosti stig úr þessum leik. Það verður kannski hlegið af mér fyrir að segja þetta. En þegar staðan er 1-0 og tíu mínútur eftir þá getur allt gerst. Okkur tókst ekki að komast yfir línuna í þetta sinn."
Grótta var að spila við eitt besta lið landsins í kvöld. Var hann ekki sáttur með baráttuna í sínum mönnum?
„Ég veit það ekki. Það hefur verið vandamálið hjá okkar liði, að vera ánægðir að berjast gegn liðum sem eru talin betri en við. Það er eitthvað sem við erum að reyna að breyta. Ég vil ekki að við séum sáttir með að gefa þeim bara leik. Þetta er erfitt verkefni og ég ber virðingu fyrir Víkingi en á sama tíma ber ég virðingu fyrir þeim sem eru í mínum búningsklefa. Ég veit hvað þeir geta," sagði Chris.
„Við komum ekki hingað bara til að taka þátt, til að njóta dagsins. Við höfum komið hingað áður og tapað. Í dag komum við hingað til að vinna. Við ætluðum okkur að gera það."
Hægt er að sjá viðtalið í heild sinni hér að ofan en þar ræðir Chris meira um liðið sitt, breytingarnar í vetur og tímabilið sem er framundan.
