Nýliðarnir í Keflavík unnu frábæran 1-3 sigur á Íslandsmeisturum Blika í Pepsi-Max deild kvenna í dag. Gunnar Magnús, þjálfari Keflavíkur, var að vonum ánægður með fyrsta sigur liðsins í deildinni.
Lestu um leikinn: Breiðablik 1 - 3 Keflavík
„Tilfinningin er eðlilega geggjuð að leggja Íslandsmeistarana af velli og stelpurnar voru geggjaðar í leiknum. Frábært vinnuframlag og dugnaður, þær fylgdu skipulagi. Það var hrein unun að horfa á þær í dag, þær áttu þetta skilið."
„Við lögðum upp með að spila þétt til baka en koma hátt á þær á ákveðnum mómentum. Svo erum við með eina baneitraða frammi, Aerial, sem olli miklum vandræðum hjá varnarmönnum Blika og gerir tvö mörk."
„Við erum nýliðar í deildinni og náum loksins í sigur. Heppnin hefur ekki verið á okkar bandi og óheppnin ellt okkur en eins og ég sagði við stelpurnar þá vinna íþróttamenn fyrir heppninni sinni."
Þetta var fyrsti sigur Keflavíkur í deildinni í sumar en nú er landsleikjahlé framundan, væri ekki gott að fá leik strax eftir þennan sigur?
„Jú auðvitað væri gott að nýta þetta og fá leik strax. En við tökum því bara og æfum vel í fríinu. Það hefur lítill tími gefist til að æfa. En þær eru líka fegnar að fá smá frí, það hefur verið mikil keyrsla og margar orðnar laskaðar þarna inná en þær létu það ekki á sig fá."
Athugasemdir
