Gunnar Einarsson sá sína menn í Víking Ólafsvík tapa stórt í kvöld er liðið mætti Njarðvík í Fótbolta.net mótinu.
Gunnar er enn að smala saman liði í Ólafsvík en liðið þurfti að sætta sig við 5-1 tap gegn Njarðvík í Reykjaneshöllinni.
Það er ekki langt síðan Gunnar tók við keflinu í Ólafsvík en hann var ráðinn þjálfari liðsins í lok nóvember síðastliðinn.
„Við höfum ekki spilað fótbolta á þriðja mánuð og þetta er leikur númer tvö hjá okkur. Við höfum verið að róteita á mörgum leikmönnum og vorum nánast komnir með nýtt lið í seinni hálfleikinn," sagði Gunnar um leikinn.
„Við erum að stíga til jarðar og forðast meiðsli, okkar hópur er ekki svo stór. Úrslitin voru ekki fögur en það er ekki aðalatriðið á þessum tímapunkti."
„Það hefur verið þannig síðastliðin ár að það er liðið sem kemur inn þegar mótið hefst sem gildir. Ég ætla að reyna að móta kjarnann í liðinu fyrr og við erum að skoða á fullu. Við erum að leita og skoða inn á markaðinn."
Gunnar tekur svo fram að frambærir íslenskir leikmenn séu í fyrirrúmi og gæti liðið styrkt sig á komandi vikum og mánuðum.
Nánar er rætt við Gunnar í spilaranum hér fyrir ofan.
Athugasemdir
