Víkingur burstaði Fram í miklum markaleik, á Lambhagavellinum 2-5 í kvöld.
„Ég er bara ótrúlega ánægður, ótrúlega glaður með þessi, með þessi þrjú stig, fyrst og fremst.“
Lestu um leikinn: Fram 2 - 5 Víkingur R.
Aðspurður hvort leikurinn hafi farið eftir plani svaraði Einar Guðnason þjálfari Víkings, „Kannski ekki alveg, við hérna fengum á okkur tvö mörk og hefðum nú getað gert betur í þeim. Við gerðum mistök í aðdragandanum í þeim báðum, þannig að það var ekki samkvæmt plani en við skorum samt fimm glæsileg mörk og í fyrri hálfleik sköpuðum við okkur færi til að skora allavega eitt eða tvö í viðbót, þannig ég er bara mjög ánægður með það.“
Bergdís kom inn á í um miðjan seinni hálfleik og gerði útum leikinn með tveimur mörkum sínum.
„Bergdís varð fyrir hnjaski í síðasta leik þannig að hún hefur ekkert æft en hún náði reyndar að æfa aðeins í gær þannig að við vorum með hana á bekknum svona, svona ef ske kynni að við lentum í vandræðum og hún heldur betur kom sterk inn“
Lindu Líf Boama var ekki á skýrslu í dag og spurður útí hvenær hann ætti von á henni, „Ég er bara ekki alveg viss, það verður bara að koma í ljós, þetta eru svona erfið meiðsli en hérna og svo óútreiknanleg, þannig ég bara þori ekki að lofa því hvenær hún kemur til baka.“
Einar vakti athygli í viðtali sem hann fór í á dögunum, aðspurður um viðbrögð við því svaraði hann, „Já nokkuð, já já ég hef fengið mjög jákvæð viðbrögð við því, frá fullt af fólki sem ég þekki ekki neitt og hefur engan áhuga á fótbolta, þannig það eru margir sem að tóku eftir viðtalinu greinilega.“
Viðtalið í heild má sjá í spilaranum hér að ofan
