Spá þjálfara í 2. deild: 4. sæti

Spáin:
1.
2.
3.
4. Dalvík/Reynir, 77 stig
5. Höttur/Huginn, 76 stig
6. Víkingur Ó., 74 stig
7. Haukar, 66 stig
8. Þróttur V., 60 stig
9. Ægir, 56 stig
10. KFG, 39 stig
11. Víðir, 33 stig
12. Kormákur/Hvöt, 16 stig

4. Dalvík/Reynir
Dalvíkingar eru mættir aftur í 2. deild eftir stutt stopp í Lengjudeildinni. Þeir áttu ekki mikinn möguleika á því að halda sér uppi í Lengjudeildinni á síðasta ári eftir að hafa komist óvænt þar upp árið áður. Þetta var á endanum einfaldlega oft stórt stökk; Dalvíkurliðið endaði með aðeins 13 stig og tókst aðeins að vinna tvo leiki um sumarið. Þeir eru núna komnir aftur í 2. deild og það er búist við því að þeir verði í toppbaráttu í sumar. Dalvík hefur verið að flakka á milli 2 og 3. deildar síðastliðin tuttugu ár. Dalvík/Reynir komst upp úr 3. deild árið 2022 og var spáð sjöunda sæti í 2. deild árið 2023, en þeir flugu upp þá. Hvað gera þeir í sumar?

Þjálfarinn: Hörður Snævar Jónsson tók að sér það verkefni að stíga í fótspor Dragan Stojanovic sem gerði frábæra hluti með liðið. Þetta er mjög svo áhugaverð ráðning en Hörður er þekktari fyrir blaðamennsku heldur en þjálfun þar sem hann hefur verið ritstjóri fótboltamiðilsins 433.is síðustu árin. Hann flutti til Dalvíkur fyrir nokkrum árum og hefur komið sterkur inn í fótboltann í bæjarfélaginu. Hann hefur setið í stjórn Dalvíkur/Reynis og tekur núna við liðinu. Hann er með öflugan aðstoðarmann með sér en Óskar Bragason er aðstoðarþjálfari liðsins. Hann er reynslumikill þjálfari og er gott fyrir Hörð að hafa hann með sér.

Stóra spurningin: Hvernig gengur ritstjóranum í nýju hlutverki?
Við höfum áður séð það að ritstjórum gangi vel í þjálfarahlutverkinu. Magnús Már Einarsson, fyrrum ritstjóri Fótbolta.net, kom Aftureldingu upp í Bestu deildina síðasta sumar og hefur gert frábæra hluti í Mosfellsbænum. Núna stígur Hörður Snævar inn í nýtt hlutverk og verður virkilega gaman að sjá hvernig honum vegnnar. Hann hefur komið skemmtilega inn í þetta nú þegar og virðist hafa mikla ástríðu fyrir þessu verkefni.

Grasrótin er nýr hlaðvarpsþáttur sem fjallar alfarið um neðri deildirnar á Íslandi. Þeir velja tvo lykilmenn og einn sem gaman verður að fylgjast með úr hverju liði í 2. deild karla.

Lykilmenn: Áki Sölvason og Þröstur Mikael Jónasson
Áki hefur verið markaóður síðustu tímabil og hefur skorað 44 mörk síðastliðin þrjú tímabil. Hann á leiki í efstu deild með KA og verður hann að skora ef þeir ætla sér eitthvað í sumar. Þröstur Mikael hefur verið fyrirliði liðsins og gríðar mikilvægur innan sem utan vallar. Hann hefur ekkert spilað á undirbúningstímabilinu svo það er ákveðið spurningarmerki í kringum standið á honum.

Gaman að fylgjast með: Martim Sequeira
Framherji sem kom til Dalvíkur frá Hetti/Huginn í vetur. Hann skoraði 13 mörk í 2. deildinni í fyrra og því verður gaman að sjá hvort hann haldi uppteknum hætti. Hann er mjög virkur á tiktok, þar sem hann sýnir frá æfingum, klippum úr leikjum og hvernig það er að vera atvinnumaður í fótbolta.

Komnir:
Alex Máni Gærdbo Garðarsson frá KF
Auðunn Ingi Valtýsson frá Þór
Bjarmi Már Eiríksson frá Tindastóli
Martim Fortuna Soares Sequeira Cardoso frá Hetti/Hugin
Miguel Joao De Freitas Goncalves frá Portúgal
Remi Marie Emeriau frá Rúmeníu
Sindri Sigurðarson frá KA
Sævar Þór Fylkisson frá KF

Farnir:
Breki Hólm Baldursson í ÍR (Var á láni frá KA)
Franko Lalic í Þór
Hassan Jalloh til Grindavíkur (Var á láni)
Matheus Bissi Da Silva í KFA
Nikola Kristinn Stojanovic í KFA

Þjálfarinn segir - Hörður Snævar Jónsson
„Spáin er bara eðlileg, ég held að flestir sem spá í þessa deild eigi mjög erfitt með að lesa í mörg lið. Félögin hafa mörg á síðustu vikum styrkt sig mikið og glugginn er áfram opinn þegar þetta er skrifað, því á raunverulegur styrkur liðanna eftir að koma í ljós."

„Ellefu leikmenn sem komu við sögu í Lengjudeildinni í fyrra verða ekki með okkur í ár, tíu fóru og svo urðum við fyrir áfalli þegar Freyr Jónsson þurfti að fara undir hnífinn snemma árs. Hann getur ekki verið með í sumar vegna þess en í mínum huga hefði hann orðið einn besti miðjumaður deildarinnar í sumar."

„Það er sterkur kjarni frá síðustu árum sem er hérna áfram sem er mjög mikilvægt, við höfum svo bætt í hópinn með öflugum strákum hér af svæðinu og fengum svo þrjá erlenda leikmenn til liðs við okkur. Þeir hafa komist vel inn í hlutina og halda vonandi áfram að vaxa."

„Sumarið verður skemmtilegt, undirbúningstímabilið hefur verið upp og niður en undanfarnar vikur finnst mér eins og takturinn sé að verða réttur þrátt fyrir nokkur meiðsli lykilmanna. Það kemur svo í ljós í fyrstu umferðunum hvort það sé rétt mat. Við erum með marga nýja leikmenn sem hafa flestir smollið vel inn í hlutina og þá spilamennsku sem við viljum standa fyrir í sumar."

Fyrstu þrír leikir Dalvíkur/Reynis:
3. maí, Dalvík/Reynir - Haukar (Dalvíkurvöllur)
10. maí, Þróttur V. - Dalvík/Reynir (Vogaídýfuvöllur)
16. maí, Dalvík/Reynir - Höttur/Huginn (Dalvíkurvöllur)