Ásgeir Frank Ásgeirsson
Ásgeir Frank Ásgeirsson aðstoðarþjálfari Fjölnis var til viðtals eftir 5-4 tap Fjölnismanna gegn Keflavík í Keflavík í kvöld. Fjölnismenn leiddu 4-2 þegar skammt var til leiksloka en allt kom fyrir ekki og skoruðu heimamenn þrjú mörk á lokamínútum leiksins. Er hægt að koma tilfinningum sínum í orð eftir svona leik?
Lestu um leikinn: Keflavík 5 - 4 Fjölnir
„Nei það er í raun og veru ekki hægt. Maður er náttúrulega bara orðlaus eftir þetta og þá kannski meira eftir að þetta gerist tvo leiki í röð.“
„Við spilum hérna frábæran leik. Þótt að þeir fái færi þá fengum við líka færi og spiluðum orkumikinn leik sem við lögðum upp með. Pressuðum þá eins mikið og við gátum og mér fannst við vera að gera það mjög vel. En í seinni hálfleik fannst mér við falla of snemma niður og þeir tóku kannski svolítið yfir leikinn. Voru ekki að skapa sér eitthvað mikið en fengu einhver færi en svo koma þessar mínútur þarna í lokin.“
„Okkur leið vel, þetta var ekkert í kortunum og það var engin að spá í þessu. Svo byrjar þetta bara, bombað á markið þrisvar í röð og þrjú mörk. Maður eiginlega bara trúir þessu ekki.“
Líkt og Ásgeir segir er Fjölnir að missa niður forystu á ögurstundu annan leikinn í röð. Hvaða lærdóm þurfa menn að draga af þessu og gera í framhaldinu?
„Við þurfum að grafa djúpt. Ef við horfum á síðustu 4-5 leiki þá er frammistaðan að stórum hluta mjög góð. Á undan því vorum við ekki að finna þær. Mér finnst vera kominn góður taktur í liðið og liðið í góðu standi. Við erum að hlaupa og djöflast alveg út í eitt. En þetta er bara ekki boðlegt, það er talað um að þessi deild sé jöfn. Þannig að þegar þú ert 4-2 yfir á móti liðum sama hvað það er þá klárar þú svona leik. Það er það eina sem ég tek tekið út úr þessu að við vonandi lærum af þessu,“
Sagði Ásgeir en allt viðtalið við hann má sjá hér að ofan
Athugasemdir
