Kayla reynir fyrir sér í íslenska boltanum.
Íslandsmeistarar Breiðabliks eru búnir að styrkja sig með markverði úr bandaríska háskólaboltanum sem mun verja mark Blika á seinni hluta tímabilsins.
Blikar þurfa á markverði að halda þar sem Telma Ívarsdóttir er farin aftur út til Skotlands þar sem hún undirbýr sig fyrir nýtt tímabil með stórveldinu Rangers. Hún var varamarkvörður liðsins á síðustu leiktíð.
Kayla Elizabeth Burns flytur í Kópavoginn til að fylla í skarðið en hún er fædd árið 2002 og var valin besti markvörður ársins í fyrra í bandaríska háskólaboltanum, þegar hún varði mark University of Delaware.
Blikar eru í harðri titilbaráttu í Bestu deild kvenna þar sem liðið er jafnt Þrótti á toppinum með 25 stig eftir 10 umferðir. Telma hefur varið mark liðsins í sumar en hún var hjá Blikum á lánssamningi.
Athugasemdir
