„Þetta er svekkjandi því við komumst yfir og okkur langaði að vinna þennan leik. Okkur langaði að vinna þá í sumar, búnir að spila þrjá leiki við þá núna. Bara heilt yfir svekktur held ég.“ sagði Aron Elí, fyrirliði Aftureldingar, eftir 1-1 jafntefli gegn Fram í kvöld.
Lestu um leikinn: Afturelding 1 - 1 Fram
Horfir Aron á þetta sem tvö töpuð stig úr því sem komið var?
„Já mér finnst það og sérstaklega hvernig okkur líður á heimavelli, massívir varnarlega. Það að komast yfir og gefa þeim ódýrt mark, þá finnst mér við vera að tapa þessum stigum.“
Freyr Sigurðsson fékk dauðafæri undir blálokin til að koma Fram yfir en klúðraði. Var Aron orðinn eitthvað stressaður þegar Freyr var kominn í færi?
„Ég verð ekki mikið stressaður en mér fannst við sökkva of mikið og reyna að verja forystuna of mikið. Kannski fer maður í það að hlaupa ekki eins mikið, bjóða sig ekki eins mikið og við hleyptum þeim of framarlega og þá er maður að bjóða hættunni heim. En við fáum hörkufæri, skalla í slá, skalla sem var bjargaður á línu þannig við hefðum getað skorað fleiri.“
Það kom smá líf í Framarana og Afturelding féll aftarlega á völlinn eftir að Fram jafnaði leikinn. Afhverju var það raunin?
„Sama og þegar við skorum, afhverju að hætta? Við vorum með þá einhvernveginn. Þeir voru ekki að fá mikið af færum og við vorum að taka hættulegustu mennina þeirra út úr leiknum vel. Afhverju ekki að hamra á járnin á meðan þau eru heit og skora fleiri?“
Hvernig finnst Aroni fyrstu 15 leikirnir með Aftureldingu hafa verið í efstu deild?
„Heilt yfir flott. Ég held að við höfum bullandi trú á sjálfum okkur, spila óhræddir, skiptir engu máli hverjum við erum að mæta. Við viljum spila okkar bolta og standa fyrir okkar gildi. Með því að leggja okkur fram og spila sem lið getum við fengið stig á móti öllum, við höfum verið að gera það og við verðum að halda því áfram. Ekkert vera að hugsa það sem er í gangi. Bara njóta þess að spila fótbolta í efstu deild og halda áfram að safna stigum.“
Viðtalið við Aron Elí má finna í heild sinni í spilaranum hér að ofan.
Athugasemdir