Manchester United hefur á síðustu árum gengið í gegnum dimma dali og það er eiginlega óhætt að fullyrða að síðasta tímabil hafi verið lágpunkturinn þar sem liðið endaði í 15. sæti ensku úrvalsdeildarinnar og tapaði úrslitaleik Evrópudeildarinnar gegn Tottenham af öllum liðum. Rúben Amorim tók við liðinu á miðju síðasta tímabili eftir að Erik ten Hag fékk á einhvern óskiljanlegan hátt að halda áfram með liðið þrátt fyrir skýr merki um að liðið væri á leið aftur á bak undir hans stjórn. Amorim kom inn með gríðarlegar áherslubreytingar sem virkuðu svo sannarlega ekki vel á síðasta tímabili.

Amorim fór í þriggja manna vörn, 3-4-3 kerfið sem hann notaðist við hjá Sporting Lissabon í Portúgal með frábærum árangri. United vann hins vegar bara 17 af 42 leikjum undir stjórn Amorim á síðasta tímabili og það lá alveg ljóst fyrir þá að þessar breytingar myndu taka tíma. Það var mikið högg fyrir Man Utd að tapa úrslitaleik Evrópudeildarinnar þar sem liðið missti þá af bikar og Meistaradeildarsæti á sama tíma. En kannski var það líka jákvætt, ákveðin vakning fyrir stjórnendur félagsins og ekki síst leikmennina. Það þarf ekkert að skafa af því, síðasta tímabil var gjörsamlega hryllilegt og það þarf ýmislegt að breytast.

Man Utd er samt sem áður enn eitt allra stærsta félag heims og það hefur sést á leikmannamarkaðnum í sumar. Bryan Mbeumo og Matheus Cunha völdu United fram yfir önnur félög í Meistaradeildinni og sóknarmaðurinn Benjamin Sesko er líka að gera það. Mbeumo og Cunha eru komnir yfir línuna og Sesko, sem er einn mest spennandi sóknarmaður í heimi, er á leiðinni. Svo er miðjumaðurinn Carlos Baleba orðaður við United ásamt markverðinum Gianluigi Donnarumma. Man Utd mun mæta með mikið breytt lið til leiks í vetur en Amorim fær ekki endalausan tíma. Ef úrslitin verða áfram léleg, þá verður pressan fljót að myndast á Portúgalanum. En þetta getur eiginlega í raun ekki versnað. Sir Jim Ratcliffe hefur gert talsverðar breytingar frá því hann kom inn í eigendahóp United og hann þarf fljótlega að fara að skila einhverjum árangri.

Stjórinn: Rúben Amorim tók við sem stjóri Manchester United í nóvember 2024 og er nú að undirbúa sitt fyrsta heila tímabil sem stjóri liðsins. Byrjunin hjá Portúgalanum var mjög erfið – liðið endaði í 15. sæti úrvalsdeildarinnar og náði ekki Evrópusæti – en Amorim hefur lýst því yfir að hann sé staðráðinn í að halda áfram og byggja eitthvað upp til framtíðar. Hann hefur viðurkennt að hafa íhugað að segja af sér á meðan síðasta tímabil stóð yfir, en með stuðningi frá lykilleikmönnum eins og Bruno Fernandes virðist hann nú vera ákveðinn í að breyta kúltúrnum innan félagsins til lengri tíma. Taktískt vill Amorim leika með 3-4-3 eða 3-4-2-1 kerfi með vængbakverði, hröðum skyndisóknum og agaðri pressu. Amorim er harður í horn að taka og er að mynda hópinn eftir sinni sýn og sínum áherslum. Nokkrir leikmenn hafa ekki fengið að koma nálægt hópnum í sumar en Amorim telur þá ekki henta sér eða þá að þeir eru ekki nógu sterkir persónuleikar í verkefnið. Þó verkefnið sé enn á byrjunarreit, þá er ljóst að Amorim er að reyna að byggja upp lið með skýra hugmyndafræði, kröfur og framtíðarsýn. Nú er bara spurning hvort honum takist það sem David Moyes, Louis van Gaal, Jose Mourinho, Ole Gunnar Solskjær og Erik ten Hag tókst ekki - að koma þessu sögufræga félagi aftur á toppinn.

Ruben Amorim knows where he wants to be ???? pic.twitter.com/s416OVtY4r
— Premier League (@premierleague) August 3, 2025

Leikmannaglugginn: Þó Man Utd hafi endað í 15. sæti á síðasta tímabili þá hefur félaginu tekist að sannfæra öfluga leikmenn um að koma á Old Trafford. Búið er að fríska upp á sóknarleikinn en þarf enn að styrkja markvarðarstöðuna, vörnina og miðjuna.

Komnir:
Bryan Mbeumo frá Brentford - 71 milljón punda
Matheus Cunha frá Wolves - 62,5 milljónir punda
Diego Léon frá Cerro Porteño 3,3 milljónir punda
Jadon Sancho frá Chelsea - Var á láni
Antony frá Real Betis - Var á láni
Tyrell Malacia frá PSV - Var á láni

Farnir:
Marcus Rashford til Barcelona - Á láni
Victor Lindelöf - Samningur rann út
Christian Eriksen - Samningur rann út
Jonny Evans - Lagði skóna á hilluna

Þrír lykilmenn:
Leny Yoro er gríðarlega efnilegur varnarmaður sem tók mjög jákvæð skref undir lok síðasta tímabils í varnarlínu United. Hann virðist vera leikmaður sem Amorim er mjög hrifinn af. Franski miðvörðurinn var einn af fáum ljósum punktum á síðasta tímabili hjá United. Hann átti erfiða leiki inn á milli - skiljanlega - en í lokin gat hann gengið stoltur frá borði. Yoro er bara 19 ára en hann var keyptur til Man Utd á mikinn pening og mun spila stóra hlutverk á komandi tímabili.

Bruno Fernandes er langmikilvægasti leikmaður Manchester United en hann er fyrirliðinn og þeirra yfirburðarbesti fótboltamaður. Þrátt fyrir hörmulegt gengi United á síðasta tímabili, þá var umræða um það að Bruno ætti heima í liði ársins. Það segir sitt en hann hefur þurft að draga liðið á herðum sér undanfarin ár. Hann á það til að væla aðeins of mikið en þegar hausinn er rétt skrúfaður á, þá er hann einn besti leikmaður deildarinnar. Hann hefur komið að 113 mörkum í 195 leikjum í ensku úrvalsdeildinni.

Bryan Mbeumo eru stærstu kaup Man Utd hingað til í sumar en félagið lagði mikið á sig til að landa honum frá Brentford. Á endanum borgaði United 71 milljón punda til að kaupa Mbeumo sem talaði svo um Man Utd sem félaga drauma sinna. Önnur félög sýndu honum áhuga en hann vildi bara United. Mbeumo skoraði 20 mörk fyrir Brentford á síðasta tímabili og ætti að geta kryddað upp á sóknarleik United með hraða sínum og krafti.

Fylgist með: Benjamin Sesko er gríðarlega spennandi sóknarmaður sem United að kaupa frá RB Leipzig á einhverjar 85 milljónir evra. Slóvenski fótboltafréttamaðurinn Izidor Kordic segir við breska ríkisútvarpið að Sesko sé með hugarfar upp á 10 af 10 og sé fullkominn fyrir ensku úrvalsdeildina. „Hann er með hæfileika til að geta haft sömu áhrif hjá Manchester United og Erling Haaland hjá Manchester City," segir Kordic en þetta eru stór ummæli. Sesko átti að vera maðurinn til að leysa Alexander Isak af hólmi hjá Newcastle en í staðinn tekur hann að sér það verðuga verkefni að leiða sóknarlínuna á Old Trafford. Það verður svo sannarlega spennandi að fylgjast með þessu nýja sóknartríói; Cunha, Mbeumo og Sesko. Þá verður líka áhugavert að fylgjast með United á síðustu dögum leikmannagluggans, hvort það bætist fleiri spennandi leikmenn við hópinn og hvort það takist að selja Garnacho, Sancho og Antony.

Besta og versta mögulega niðurstaða: United hefur litið ágætlega út á undirbúningstímabilinu. Ef leikmenn fara að skilja pælingar Amorim meira og fara að tengja betur saman, þá er ekki útilokað að Man Utd blandi sér í Meistaradeildarbaráttuna. Ef allt fer á versta veg, þá endar liðið titlalaust og í kringum miðja deild. Þetta verður alltaf skárra en á síðasta tímabili, er það ekki annars?

Þau sem spáðu: Anton Freyr Jónsson, Elíza Gígja Ómarsdóttir, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Ívan Guðjón Baldursson, Kári Snorrason, Mate Dalmay, Snæbjört Pálsdóttir, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke og Sölvi Haraldsson.

Liðin fengu eitt stig og upp í 20 eftir það hvar hver og einn spáði þeim. Liðið í síðasta sæti fékk eitt stig, liðið í 19. sæti tvö stig og koll af kolli. Stigin í spánni tengjast á engan hátt stigafjölda liðanna í deildinni..

Spáin:
1. ?
2. ?
3. ?
4. ?
5. ?
6. ?
7. ?
8. Man Utd, 157 stig
9. Brighton, 144 stig
10. Nottingham Forest, 108 stig
11. Crystal Palace, 98 stig
12. Everton, 97 stig
13. Fulham, 93 stig
14. West Ham, 92 stig
15. Bournemouth, 85 stig
16. Brentford, 79 stig
17. Leeds, 53 stig
18. Wolves, 50 stig
19. Sunderland, 33 stig
20. Burnley, 22 stig

Athugasemdir

19:04

Kane skoraði og átti svakalegt vítaklúður gegn gömlu félögunum

19:00

Riftir við Barcelona og á leið til Al Nassr