Spáin fyrir enska: 13. sæti

Fulham kemur inn í úrvalsdeildartímabilið 2025–26 með aukið sjálfstraust eftir gott tímabil í fyrra. Þeir enduðu í 11. sæti deildarinnar, sem er besta staða liðsins í nokkur ár, og stuðningsmenn vonast til að liðið geti komist enn hærra núna á komandi tímabili. Marco Silva er enn við stjórnvölinn en hann hefur sýnt það að hann er virkilega fær í því að ná sem mestu út úr leikmönnum sínum. Hann skrifaði nýverið undir nýjan samning, sem sýnir að félagið treystir honum til að byggja áfram upp, og einnig að hann hefur trú á því sem félagið er að gera. Hann hefur áður hafnað stórum tilboðum frá Sádi-Arabíu til að stýra Fulham. Íþróttastjórinn Tony Khan spilar einnig stórt hlutverk þar sem hann leggur áherslu á gagnagreiningu og skynsöm leikmannakaup sem hefur hjálpað Fulham að styrkja liðið með sterku jafnvægi milli reynslu og yngri leikmanna.

Ein áhugaverðasta fréttin í sumar er að miðjumaðurinn ungi Josh King hefur skrifað undir fjögurra ára samning við félagið. Stuðningsmenn vona að hann geti orðið fastamaður í liðinu, en hann er afar spennandi; hefur til að mynda spilað fyrir flest yngri landslið Englands. Á sama tíma eru Fulham að reyna að bæta við meiri sóknarþunga. Þeir hafa sýnt áhuga á að kaupa nígeríska framherjann Tolu Arokodare, sem var markahæstur í belgísku úrvalsdeildinni á síðasta tímabili. Rodrigo Muniz og Raúl Jiménez verða þá áfram mikilvægir leikmenn, en Fulham veit að liðið þarf fleiri mörk til að komast í efri hluta töflunnar. Þeir hafa einnig haft auga á miðjumönnum eins og Kiernan Dewsbury-Hall, til að bæta sköpunargáfu og kraft á miðjunni.

Tímabilið byrjar með útileik gegn Brighton 16. ágúst, og síðan taka við stórleikir gegn Manchester United heima og Chelsea úti í sama mánuði. Þessir fyrstu leikir verða mikil prófraun fyrir liðið og sýna hversu vel undirbúið það er til að taka skref fram á við. Þó Fulham sé ekki talið líklegt til að falla, þá þurfa þeir samt að passa sig að sogast ekki niður. En ef þeir halda vörninni sterkri, bæta við fleiri mörkum og halda lykilmönnum heilum, þá ættu þeir að geta náð öðru góðu tímabili undir stjórn hins trausta Marco Silva.

Stjórinn: Eins og áður kemur fram er Marco Silva áfram við stjórnvölinn há Fulham þar sem hann virðist vera búinn að finna sterkt heimili fyrir sjálfan sig. Hann er núna sá stjóri í ensku úrvalsdeildinni sem hefur verið lengst hjá sama liðinu fyrir utan Pep Guardiola og Mikel Arteta, en hann hefur stýrt Fulham í rúm fjögur ár með góðum árangri. Hann hefur hafnað stórum tilboðum frá Sádi-Arabíu og virðist líða mjög vel í London. Marco Silva hefur fært sig í sessi sem einn virtasti stjóri ensku úrvalsdeildarinnar á tíma sínum hjá Fulham en hann hefur komið inn með stöðugleika á metnað í félagið. Hann kom liðinu upp úr Championship og hefur fest það í sessi á góðum stað í ensku úrvalsdeildinni. Silva er þekktur fyrir sveigjanlega taktík þar sem hann nær að blanda saman sóknarleik og skipulagðri vörn, og aðlagar leikkerfi sitt oft eftir mótherjum. Hann hefur þróað leikmenn áfram, gefið ungum leikmönnum tækifæri og skapað jafnvægi á milli reynslu og yngri leikmanna. Róleg framkoma hans, skýr leikstefna og hæfileiki til að þróa leikmenn áfram gera hann að lykilmanneskju í framþróun Fulham.

Leikmannaglugginn: Það eina sem Fulham hefur fengið inn til þessa er einn varamarkvörður en á sama tíma hefur liðið ekki misst mikið. Það má alveg búast við því að komi inn sóknarmaður áður en glugginn lokar og það er lykilatriði að halda í Rodrigo Muniz sem er undir smásjá Newcastle.



Besta og versta mögulega niðurstaða: Besta niðurstaðan er sú að Fulham taki skref fram á við í vetur og lendi í topp tíu, og jafnvel topp átta. Versta mögulega niðurstaðan er að það komi engir nýir leikmenn inn, það gangi ekkert á markaðnum, og að liðið lendi í fallbaráttu. Það er þó erfitt að sjá það að Fulham falli eftir góð tímabil að undanförnu.

Þau sem spáðu: Anton Freyr Jónsson, Elíza Gígja Ómarsdóttir, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Ívan Guðjón Baldursson, Kári Snorrason, Mate Dalmay, Snæbjört Pálsdóttir, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke og Sölvi Haraldsson.

Liðin fengu eitt stig og upp í 20 eftir það hvar hver og einn spáði þeim. Liðið í síðasta sæti fékk eitt stig, liðið í 19. sæti tvö stig og koll af kolli. Stigin í spánni tengjast á engan hátt stigafjölda liðanna í deildinni..

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ?
11. ?
12. ?
13. Fulham, 93 stig
14. West Ham, 92 stig
15. Bournemouth, 85 stig
16. Brentford, 79 stig
17. Leeds, 53 stig
18. Wolves, 50 stig
19. Sunderland, 33 stig
20. Burnley, 22 stig