Spáin fyrir enska: 5. sæti

"Newcastle have become football's version of the undateables." ????

Liam Delap ?
Joao Pedro ?
Bryan Mbeumo ?
Matheus Cunha ?
Hugo Ekitike ?
James Trafford ?
Benjamin Sesko ?

A brutal summary of Newcastle's transfer window from @LukeEdwardsTele ????#BBCFootball #NUFC pic.twitter.com/kjpRkeODIH

— BBC 5 Live Sport (@5liveSport) August 6, 2025

Newcastle vann bikar á síðasta tímabili og er aftur í Meistaradeildinni, en liðið þarf að byggja á þeim árangri til að verða enn stærra félag og meira heillandi í augum úrvalsleikmanna. Það er ekki langt síðan Newcastle, sem er stór klúbbur á Englandi, var að rokka á milli efstu og næst efstu deildar, en félagið hefur verið í mikilli endurbyggingu síðustu ár og er komið á góðan stað í efri hluta deildarinnar. En félagið virðist ekki vera alveg komið nægilega langt til að geta barist við allra stærstu félögin um leikmenn. Stoltið er væntanlega stært eftir allar hafnanirnar í sumar og hvað þá eftir að Alexander Isak, þeirra besti leikmaður, tjáði félaginu það að hann vildi fara til Liverpool. Óvíst er hvernig það mun þróast en eins og staðan er núna er Isak áfram leikmaður Newcastle þó hann vilji fara annað. Spurning er hvernig stuðningsmenn félagsins munu taka honum ef hann fer ekki áður en leikmannaglugginn lokar. Newcastle hefur ekki litið frábærlega út á undirbúningstímabilinu og Eddie Howe þarf að þjappa hópnum vel saman fljótt því deildin er að hefjast.

Stjórinn: Eddie Howe stýrir Newcastle áfram en hann hefur verið í því starfi frá 2021. Áður en hann tók við Newcastle þá náði hann mögnuðum árangri með Bournemouth þar sem liðið fór úr D-deild alla leið upp í úrvalsdeild undir hans stjórn. Howe tók við Bournemouth stuttu eftir að leikmannaferlinum lauk en hann var varnarmaður sem spilaði lengst af með Bournemouth og má með sanni segja að hann sé einhver mesta goðsögn í sögu þess félags. Howe tók við Newcastle í nóvember 2021, stuttu eftir að eigendurnir frá Sádi-Arabíu tóku við eignarhaldi félagsins. Howe tók við starfinu af Steve Bruce, en stuðningsmenn Newcastle vilja líklega helst gleyma þeim tíma sem Bruce stýrði liðinu. Sá tími, og tíminn þar áður, var nefnilega alveg frekar skrautlegur. Howe hefur gert virkilega vel með Newcastle en hann stýrði liðinu til bikars á síðustu leiktíð og hefur komið félaginu tvisvar í Meistaradeildina. Það er spurning hvort hann sé maðurinn sem komi Newcastle alla leið á toppinn en það er ekki um það efast að hann sé frábær stjóri. Hann er mjög öflugur í að þróa leikmenn og er góður í að vinna með ungum leikmönnum. Howe er rólegur og mjög viðkunnalegur náungi, en aðstoðarmaður hans, Jason Tindall, er meira fyrir athyglina.

Leikmannaglugginn: Eins og áður segir hefur leikmannaglugginn verið erfiður fyrir Newcastle. Tveir leikmenn eru komnir inn en einhverjir átta leikmenn hafa hafnað Newcastle og valið önnur félög, nú síðast Benjamin Sesko sem fór til Manchester United. Það mun þó eflaust eitthvað gerast á næstu dögum og vikum hjá Newcastle á markaðnum.

Komnir:
Anthony Elanga frá Nottingham Forest - 55 milljónir punda
Aaron Ramsdale frá Southampton - Á láni

Farnir:
Lloyd Kelly til Juventus - 20 milljónir punda
Sean Longstaff til Leeds - 12 milljónir punda
Martin Dubravka til Burnley - Óuppgefið kaupverð
Isaac Hayden - Samningur rann út
Callum Wilson til West Ham - Á frjálsri sölu
Jamal Lewis - Samningur rann út

Líklegt byrjunarlið


Þrír lykilmenn:
Sven Botman hefur sýnt það hversu öflugur þegar hann helst heill. Því miður hefur það verið vandamál fyrir hann að sleppa við meiðsli. Ef hann er heill þá getur hann verið einn besti miðvörður ensku úrvalsdeildarinnar og eru hann og Fabian Schär mjög öflugir saman. Er rólegur á boltanum og mjög sterkur í einvígum, hvort sem þau eru á jörðinni eða í loftinu.

Sandro Tonali sýndi það á síðasta tímabili hversu góður hann er í fótbolta. Tími hans hjá Newcastle byrjaði ekki vel því hann var dæmdur í bann fyrir brot á veðmálareglum. Hann hugsaði sinn gang og kom sterkari til baka úr banninu. Hefur allt í sínum leik og getur tekið stjórnina. Það hafa stór félög sýnt honum áhuga en það er enginn möguleiki á því að Newcastle sé að fara að selja hann.

Bruno Guimaraes er fyrirliðinn og hjartað í liðinu. Var einn af þeim fyrstu sem var fenginn til félagsins eftir að eigendurnir frá Sádi-Arabíu tóku við. Hann hafði þá verið að spila í Frakklandi með Lyon en sýndi það fljótt á Englandi hversu öflugur hann er. Hann er afar mikill leiðtogi fyrir þetta félag og hefur talað mikið um það frá því hann kom til Newcastle hversu mikið hann elskar félagið, stuðningsmennina og borgina.

Fylgist með: Það verður gríðarlega áhugavert að sjá hvað gerist með Alexander Isak. Hann væri auðvitað á meðal lykilmanna hér að ofan ef staðan væri eðlilega, en það er hún ekki. Englandsmeistarar Liverpool gerðu á dögunum tilboð í hann sem var hafnað; tilboðið var upp á 110 milljónir punda en Newcastle vill fá 150 milljónir punda til að selja. Isak er einn besti sóknarmaður ensku úrvalsdeildarinnar en hann hefur tjáð Newcastle það að hann vilji fara frá félaginu sem er auðvitað mikið högg. Það eru núna um þrjár vikur eftir af glugganum og spurning hvað gerist, en sænski sóknarmaðurinn hefur lítið verið í kringum lið Newcastle á undirbúningstímabilinu út af þessu öllu saman. Hvað varðar spennandi leikmenn þá er landi Isak, Anthony Elanga, mættur til Newcastle og verður spennandi að sjá hann í svörtu og hvítu. Leikmaður sem ógnar með hraða sínum og krafti.

????? | @FabrizioRomano: Liverpool maintain their confidence in trying to make a deal for Alexander Isak happen.

“For sure there will be a story to follow in the next days”. pic.twitter.com/UK4ByAkPqH

— Anfield Edition | æ (@AnfieldEdition) August 10, 2025