Spáin fyrir enska: 3. sæti

Arteta’s been building for years… Glasner’s just moved in and already redecorated the trophy cabinet. ???????? pic.twitter.com/jcApX0cg03

— SPORF (@Sporf) August 11, 2025

Það er búið að eyða miklu í að styrkja hópinn hjá Arsenal og það er pressa á Arteta að fara loksins að skila einhverjum bikurum í hús. Arsenal hefur verið nálægt því síðustu ár en það er kannski bara saga Arsenal: Að vera nálægt því. Þeir þurfa allavega að sanna að svo er ekki og komandi tímabil verður stór prófraun. Það er loksins kominn sóknarmaður, Viktor Gyökeres var keyptur frá Sporting Lissabon. Það er ekki síður pressa á honum en hann hefur raðað inn mörkum í Portúgal síðustu árin. Martin Zubimendi var líka keyptur á mikinn pening á miðjuna og hann á að gera liðið sterkara. Arsenal er spáð þriðja sæti en það verður ekki ásættanlegur árangur fyrir stuðningsmenn félagsins sem þrá að vinna stóra titla. Arteta og leikmenn hans þurfa að skila því í hús þetta tímabilið. Arsenal byrjar tímabilið á Old Trafford 17. ágúst og það verður vægast sagt áhugaverður leikur sem verður mikil umræða um.

Stjórinn: Mikel Arteta tók við Arsenal í desember 2019 og hefur eins og áður segir tekið liðið fram á við. En einn FA-bikar og tveir Samfélagsskildir á fimm og hálfu ári er einfaldlega ekki alveg nægilega gott. Hann hefur skilað liðinu þrisvar í röð í annað sæti ensku úrvalsdeildarinnar og kom hann Arsenal í undanúrslit Meistaradeildarinnar á síðustu leiktíð. Næstum því, en ekki alveg. Arteta er afar ástríðufullur stjóri sem spilaði sem leikmaður með Arsenal frá 2011 til 2016. Hann var öflugur miðjumaður sem spilaði líka með Paris Saint-Germain, Rangers og Real Sociedad á ferli sínum sem leikmaður. Hann kom úr Barcelona skólanum en spilaði ekki þar með aðalliðinu. Hann lærði af Pep Guardiola áður en hann tók við Arsenal en hann var aðstoðarmaður Guardiola hjá City um nokkurt skeið áður en hann fékk starfið á Emirates-leikvanginum. Arteta hefur gert vel í að þróa leikmenn og liðið áfram en núna þarf hann að sýna að hann sé sigurvegari. Arsenal er komið á þann stað að liðið þarf að vinna titla, hvort sem það er undir Arteta eða einhverjum öðrum.

Leikmannaglugginn: Arsenal hefur styrkt liðið sitt vel í leikmannaglugganum og bætt við breiddina. Viktor Gyökeres er sóknarmaðurinn sem Arsenal hefur þráð í mörg ár og hann þarf að skila mörkum. Zubimendi er öflugur miðjumaður og Madueke styrkir breiddina þó auðvitað sé hægt að setja spurningamerki við þennan stóra verðmiða á honum.

Komnir:
Viktor Gyökeres frá Sporting Lissabon - 64 milljónir punda
Martín Zubimendi frá Real Sociedad - 56 milljónir punda
Noni Madueke frá Chelsea - 48,5 milljónir punda
Cristhian Mosquera frá Valencia - 13 milljónir punda
Christian Nörgaard frá Brentford - 9 milljónir punda
Kepa Arrizabalaga frá Chelsea - 5 milljónir punda

Farnir:
Nuno Tavares til Lazio - 6,5 milljónir punda
Marquinhos til Cruzeiro - 2,5 milljónir punda
Thomas Partey til Villarreal - Á frjálsri sölu
Takehiro Tomiyasu - Samningur rann út
Kieran Tierney til Celtic - Á frjálsri sölu
Jorginho til Flamengo - Á frjálsri sölu
Neto til Bournemouth - Var á láni
Raheem Sterling til Chelsea - Var á láni

Líklegt byrjunarlið


Þrír lykilmenn:
William Saliba er gríðarlega sterkur miðvörður sem hefur burði til að verða sá besti í sinni stöðu í heiminum. Hefur allt sem frábær miðvörður þarf að hafa en hann og Gabriel hafa myndað besta miðvarðapar ensku úrvalsdeildarinnar síðustu tímabil. Arsenal hefur verið með bestu vörn deildarinnar síðustu árin og Saliba er stór ástæða fyrir því.

Martin Ödegaard fann sig ekki alveg á síðasta tímabili, allavega var hann ekki eins góður og tímabilið þar á undan. Ödegaard þarf að eiga gott tímabil ef Arsenal ætlar að vinna ensku úrvalsdeildina en hann er gríðarlega skapandi og er mjög svo mikilvægur í sóknarleiknum. Er líka fyrirliði Arsenal og á að drífa liðið áfram innan sem utan vallar.

Bukayo Saka er mikilvægasti sóknarmaður Arsenal en þannig hefur það allavega verið síðastliðin tímabil. Það vita allir sem fylgjast með enska boltanum hvað Saka getur og það verður gaman að sjá hvernig hann mun fíla það að hafa alvöru níu í teignum. Saka er gríðarlega snöggur og mjög svo útsjónarsamur kantmaður sem skilar alltaf sínu.

Fylgist með: Arsenal hefur vantað hreinræktaða níu í sitt lið síðustu árin og einhverjir hafa talað um að það sé ástæðan fyrir því að liðið hefur ekki orðið meistari. Núna er þessi nía loksins mætt. Viktor Gyökeres hefur raðað inn mörkum í Portúgal en núna er hann mættur í sterkari deild og þarf að skila sínu. Hann tók treyju númer 14 sem er goðsagnarkennd hjá Arsenal og þarf að standa undir því. Stuðningsmenn Arsenal eru mjög spenntir fyrir Gyökeres og það er vonandi fyrir þá að hann skori fullt af mörkum. Í Arsenal eru líka margir mjög spennandi ungir leikmenn. Myles Lewis-Skelly og Ethan Nwaneri tóku meira hlutverk í liðinu á síðasta tímabili og hinn 15 ára gamli Max Dowman er leikmaður sem hefur fengið að spreyta sig á undirbúningstímabilinu. Það á eftir að koma í ljós hversu margar mínútur hann fær á komandi keppnistímabili en Dowman er mesta efni Englendinga í dag.

Viktor Gyokeres vs Athletic Bilbaopic.twitter.com/tT8uotvnC8

— AFC_Adi (@AFC_Adi06) August 9, 2025